5 տարի առաջ՝ մայիսի 1-ին, մի խումբ երիտասարդների նախաձեռնությամբ ստեղծվեց Վայոց ձորի մարզային երիտասարդական կենտրոնը: Առանձին մարդկանց բարության և մեծահոգության շնորհիվ է, որ կայացավ կենտրոնը, և միանգամից որոշվեց, որ այն լինելու է մարզային նշանակության: Մի քանի ամիս անց աշխատանքները ցույց տվեցին, որ կենտրոնը մի վայր է, որտեղ երիտասարդները կարող են հայտնել իրենց կարծիքն ու մտորումները։ 

Այստեղ երիտասարդներին միավորում է մեկ գաղափար` լինել ակտիվ, համախմբել ողջ մարզի երիտասարդությանը: 

2006թ. ՀՀ կառավարության որոշմամբ մարզերում բացվեցին  Երիտասարդական կենտրոններ, որոնք  սկսեցին գործել պետական հովանավորության ներքո, և որի լիազորված մարմինն է այսօր ՀՀ սպորտի և երիտասարդության հարցերի նախարարությունը: Վայոց ձորի մարզն առաջինն էր, որտեղ արդեն իսկ կայացած երիտասարդական կենտրոնի հիմքի վրա բացվեց Երիտասարդական միջոցառումների կազմակերպման կենտրոնը:

Մայիսի 12-ը կենտրոնի կամավորների և աշխատակիցների համար շատ կարևոր և նշանակալի օր էր. Եղեգնաձորի Մշակույթի տան մեծ դահլիճում անցկացվեց կենտրոնի 5-ամյակին նվիրված տոնական համերգ:  Միջոցառմանը ներկա էին Վայոց ձորի մարզպետ Վ. Մաթևոսյանը, ԱԺ պատգամավոր Ս. Սարգսյանը, Եղեգնաձորի և Վայքի քաղաքապետները, փոխմարզպետները, ուժային կառույցների ղեկավարներ և  ավելի քան 500 հանդիսատես: Դահլիճը լեփ-լեցուն էր բարի կամքի տեր մարդկանցով, ովքեր միշտ և՜ հոգեպես, և՜ նյութապես  եղել են և կան կենտրոնի կողքին: 

Համերգային ծրագրի մասնակիցները հիմնականում կենտրոնի անդամներն էին` մարզի տաղանդավոր երիտասարդներ, ովքեր կենտրոնի շարժիչ ուժն են: Միջոցառումը նպատակ ուներ հանդիսատեսին ներկայացնելու կենտրոնի 5 տարվա անցած ուղին, կատարված և կատարվելիք աշխատանքները, կենտրոնի բարեկամներին, համագործակից բոլոր կառույցներին, մի խոսքով՝ կենտրոնի 5 տարվա կյանքը, որն ավելի տպավորիչ և խոսուն դարձավ նախապես պատրաստված տեսանյութի միջոցով: Քանի որ կենտրոնի կարևորագույն առաքելություններից է ազգային արժեքների պահպանումը և տարածումը, ուստիև համերգային ծրագիրը դասական, ժողովրդական և էստրադային երգերի, պարերի և ասմունքի մի փունջ էր: Համերգային ծրագրի մեխն էր հայկական տարազներին նոր շունչ հաղորդած ցուցադրությունը, որն անտարբեր չթողեց և ոչ մեկին: Համերգն անցավ ջերմ ու աշխույժ մթնոլորտում: Ե՜վ մարզային ղեկավարությունը, և՜ հանդիսատեսը հեռացան դահլիճից տպավորված և նման ձևաչափով հաճախակի հանդիպելու ակնկալիքով: