







| Հայրենասիրության տնկիները մի օր հզոր ծառեր են դառնալու |
Աշտարակ-Ագարակ ավտոճանապարհին է գտնվում Վանի հերոսամարտին նվիրված ՙԱրծվի թև՚ հուշակոթողը: Ի վեհ անայլայլ կեցվածքով այն միշտ գրավել է դիտողի ուշադրությունը: Հուշարձանն, իր ներկայությամբ ընդհատում է ավտոճանապարհի ձախ կողմի դատարկությունը:Մոտ մեկ ամիս առաջ, երբ վերջին անգամ անցնում էի այստեղով, հուշարձանը դեռ կանգնած էր իր հպարտ միայնության մեջ: Այսօր արդեն, նա իր արծվային հզոր հովանու ներքո պատսպարել է մոտ հինգ տասնյակ նորատունկ բարդիներ: Դեկտեմբերի 6-ին ՙԱրծվի թև՚ հուշարձանի շրջակայքում անսովոր աշխուժություն էր: Անտեսելով դեկտեմբերյան ցուրտը` ՙՀայրենապաշտ՚ ՀԿ-ի և Արագածոտն մարզի ԵՄԿԿ-ի մոտ 40 երիտասարդներ այստեղ ծառատունկ և շաբաթօրյակ էին կազմակերպել: Ծառատեսակի` բարդու ընտրությունը պատահական չէր: ՙԲարդին, կարելի է ասել, ամենահայկական ծառատեսակներից է: Բացի այդ, հուշարձանը բավականին բարձր է, և բարդիների կանաչ ՙպատը՚ շատ գեղեցիկ կդիտվի հուշարձանի քարի պատի համապատկերում՚, - բացատրեց ՙՀայրենապաշտ՚ ՀԿ-ի փոխնախագահ Արմեն Գրիգորյանը: Տնկիների համար ընտրվել է լավ տեղադրություն, դրանք եզերում են դեպի կոթողը տանող սալահատակը` կազմելով ծառուղի: Դե իսկ շաբաթօրյակի շնորհիվ մաքրվել է հուշարձանի շրջակայքը, ինչը կնպաստի շրջակա բնության ինքնավերականգնմանը: ՙԲնությունը բումերանգ է և միշտ վերադարձնում է այն ինչ մենք նրան տալիս ենք՚, - ակցիայից հետո համոզվեցին բոլոր երիտասարդները: ՙՄարդու անզգույշ գործողություններով խոր սպի է թողնում բնության վրա, և մենք փորձեցինք գոնե ինչ որ չափով բուժել այդ սպին՚: Կազմակերպիչները բացատրեցին նաև, թե ինչու են ծառատունկ-շաբաթօրյակի համար ընտրել հենց այս հուշարձանի տարածքը: ՙԱյս ակցիայով ցանկացել ենք ոչ միայն մաքրել և գեղեցկացնել հուշարձանի շրջակայքը, այլև մեր հարգանքի տուրքը մատուցել Վանի հերոսամարտում զոհվածներին՚, - ասաց Արմեն Գրիգորյանը: ՙԱյսուհետ, նորատունկ բարդիները կդառնան մեր անսահման հարգանքի խորհրդանիշը, և համոզված ենք, որ հայրենասիրության այս տնկիները մի օր հաստատ հզոր ծառեր են դառնալու՚: Նշեմ, որ ակցիան կրելու է շարունակական բնույթ: Քանի որ ՙՀայրենապաշտ՚ ՀԿ-ի և Արագածոտնի մարզի ԵՄԿԿ-ի երիտասարդները պարտավորվել են հետևել իրենց տնկիների պարարտեցմանը և առողջ աճին: |