ՀՀ երիտասարդական պատվիրակության այցն Արցախ

Հոկտեմբերի 17-18-ը հայաստանյան պատվիրակությունը՝ ՀՀ սպորտի և երիտասարդության հարցերի փոխնախարար Արթուր Պողոսյանի գլխավորությամբ, ԼՂՀ-ում մասնակցեց Համաարցախյան երիտասարդական երրորդ համաժողովին։ Հրավիրված էին ԼՂՀ և ՀՀ պետական մարմինների ներկայացուցիչներ, հասարակական կազմակերպությունների անդամներ, ուսանողներ, ակտիվ երիտասարդներ։ Քննարկվեցին Լեռնային Ղարաբաղի երիտասարդության հիմնախնդիրները, Հայաստան-Արցախ շփումների երիտասարդական ասպեկտները, ներկայացվեցին Արցախի և Հայաստանի Հանրապետության երիտասարդական պետական քաղաքականության ուղղությունները։

Ջերմուկում մեկնարկեց ՙԲազե-2008՚-ը

Արդեն 9-րդ անգամ հուլիսի 11-ին մեկնարկեց ամենամյա դարձած ՙԲազե՚ համահայկական հավաքը, որին այս տարի մասնակցում են 18-30 տարեկան 650 երիտասարդներ Հայաստանից, Արցախից, Ջավախքից, սփյուռքից:
Արդեն 2-րդ անգամ հավաքն անցկացվում է Ջերմուկ քաղաքում։ ՙԲազե՚-ի բացումը տեղի ունեցավ ՙԳլաձոր՚ առողջարանի բակում, որտեղ հավաքվել էին կապույտ, կարմիր, նարնջագույն ճակատների բաժանված խմբերը, որոնք միմյանց հետ մրցելու են մի շարք անվանակարգերում՝ երգ, պար, քանդակ, բրեյն ռինգ, ֆուտբոլ, թենիս և այլն: Ի դեպ, այս տարի մի շարք նորամուծություններ և փոփոխություններ են տեղի ունեցել մրցույթների կանոնակարգերում, որոնց ժամանակ, ըստ կազմակերպիչների՝  հաշվի են առնվելու նաև մասնակիցների՝ տարբեր տարիների առաջարկությունները: Առաջին անգամ կկազմակերպվի սպորտլանդիա մրցույթը, բանավիճային ակումբը, որոնց ընթացքում կլինեն մեր պետականությանը վերաբերող տարբեր թեմաներով քննարկումներ։  Հավաքի նախավերջին օրն ուխտագնացություն է նախատեսվել, որի ժամանակ անցյալ տարի օծված նորակառույց սուրբ Գայանե եկեղեցում կմկրտվեն  մոտ 50 մասնակիցներ։